حالىق اراسىندا «جامان اۋرۋ» اتالىپ كەتكەن دەرت 40 پەن 44 جاستاعى نازىك جاندىلار اراسىندا ءجيى كەزدەسەدى. جىل سايىن ەلىمىزدە 1700 ادام وسى دەرتتىڭ قۇربانى بولۋدا. وتكەن جىلى وبلىستا 86 ايەل قاتەرلى ىسىككە شالدىعىپ, 38-ءى كوز جۇمعان. ولاردىڭ 76 پايىزى پروفيلاكتيكالىق تەكسەرىس كەزىندە انىقتالعان. ەگەر دەر كەزىندە ەمدەلسە, دارىگەرلەردىڭ ايتۋىنا قاراعاندا, جاتىر وبىرىنا شالدىققانداردىڭ ءومىرىن بەس جىلعا دەيىن ۇزارتۋ ابدەن مۇمكىن. الداعى ۋاقىتتا دا الدىن الۋ شارالارى ۇيىمداستىرىلماق.
– ەشقانداي جولداما قاجەت ەمەس. ونكوگينەكولوگ تەگىن قابىلدادى. سكرينينگتەن وتكىزدى,–دەيدى وبلىستىق كوپبەيىندى اۋرۋحاناسى ديرەكتورىنىڭ ونكولوگيالىق قىزمەت جونىندەگى ورىنباسارى مايا ءابدىراحمانوۆا,–ەڭ باستىسى, اۋرۋدى ەرتەرەك انىقتاۋ.
وتكەن جىلى وبلىستىق اۋرۋحانانىڭ ونكولوگيالىق قىزمەتى وڭىردەگى 30400 ايەلدى تەكسەرىستەن وتكىزگەن. ونىڭ 17-سىنەن قاتەرلى ىسىك بەلگىلەرى انىقتالىپتى. دارىگەرلەر اۋرۋدىڭ الدىن-الۋ ءۇشىن 11-16 جاستاعى قىزدارعا تۇرمىس قۇرماي تۇرىپ, قاتەرلى دەرتكە قارسى ەكپە الۋدى ۇسىنادى. بۇل الەم تاجىريبەسىندە بار دۇنيە. ارقاشاندا اۋىرمايتىن جول ىزدەگەن ابزال.
بايقال ءبايادىل,
«Egemen Qazaqstan»
اقمولا وبلىسى
